متولي بصل يكتب يوميات رمضانية (أغلى البلاد)
يا عم رمضان
قبل ما نشتاق إليك
وانت موجود لسه بينَّا
قبل ما تغيب تاني عنَّا
وما نلاقيش طبيب يداوي
اللي قاعد ع القهاوي
واللي فاضي للغناوي
واللي بيفكر يهاجر
واللي ليل ونهار شكاوي
روح وفهم كل واحد
لو صحيح ع الشغل ناوي
قول له يا غالي بإيديك
لو مصر غالية عليك
اضرب بفأسك أرضها
ازرع لها
واغزل لها
خليها تفرح بيك
وشيلها جوه عينيك
انت ابنها
انت اللي مسؤول عنها
إثبت لها إنك صحيح بتحبها
مش بالكلام ..
بإيديك
افرد شراع غناويك
ده نيلها
وده بحرها
هبة نسيم تداويك
وف قربها
كل الشقا بيهون
في حبها
دي ليلى يا مجنون !
البحر ملك إيديك
ده بحرها
إرمي الشبك فيه
خير ربنا تلاقيه
واخرج كنوزها ودرها
تلقى النعيم حواليك
ليه تقلد الصعاليك
وتعيش فقير
على أرضها
يا مصري قوم
قلِّب حصاها ورملها !
فتش يا غالي في قلبها !
تلقى كنوز تغنيك
وتعيش ملك
مش عبد للمماليك !
نقطة عرق تحييك
وتحي مصر كلها
بإيديك هناها وسعدها
بإيديك ترجع مجدها
قوم ياالله ورينا همتك !
مش بالكلام ..
بإيديك !
