ساحة الإبداع
احمد حسن خلص بقي
ايوه انتهي
مابقاش خلاص
قد المعافرة والعناد …!!
ايام ما كان ماسك سلاح
والحق ليه
عمره ما فكر يأذي حد
او صابعة (هوب) ع الزناد ؟!!
سامح كتير
وغفر كتير
لكن العباد هي العباد !!
لكن الغريبة والسؤال المحوري
ازاي بيزرع جوه منه، المفتري
بساتين مدينتة الفاضلة
والظلم زاد
وازاي يكون طيب اوي
وهادي اوي
وازاي يلون فرحتة
بلون السواد
قدم سعادته لكدابين
ولغشاشين
واختار يعيش
ناصح أمين
في سنين حداد
يبكي وينزف بالدموع
ماتت سعاد
ماتت سعاد
وهي اللي ربتني غلط!!
ربتني شفاف بالقوي
مش مختلط !!
رغم القلوب حواليا
من رمل وزلط
قلبي اللي مات
هو اللي مات علشان جدع
والجدعنه ف سوق الكساد!!
والجدعنه صبحت عبط !!
……
دمتم بخير ومسرة دائماً وأبدا وبحجم كل شيئ جميل حبايب قلبي الغاليين