سامح هريدي قصيدة جديدة ( لسه القفطان ماسك عكاز )

لسه القفطان ماسك عكاز

والصورة بتخرج م البرواز 

والروح بتدَور ع السبحة 

وف قلب الذكري تروح سابحه 

وتقلِّب على قلبي مواجع 

ف بشوفك راجع بتراجع

وتحفَّظ روحي أصول العشرة

وتأكد انك مش غايب 

أصل أنت فى كل مكان سايب

100 ألف دليل انك عايش

واحنا  الأموات..

ما اهي سيرتك محتلة الحكايات ..

وملامحك ساكنة فى كل الحي 

انفاسك دايماً بتعطر رايحة الايام

خطواتك فى الروح بتخضر كل الأحلام 

الصُبح بيتنفس لما بيسمع صوتك

والليل بينام بعد سكوتك 

والكل بيسأل مستغرب

مين اللى اتشيع فى جنازتك 

طب مين كان ساكن فى تابوتك 

جلابيتك دايما تسألني

عن حضنك ليها فى كل صلاة

ومكانك في الجامع محفوظ

والكرسي بتاعك بيسبح بجِميل مولاه

الشارع واقف مستنظر

وتملي يحملني رسالة

عنوانها اكيد راجع راجع وهنستناه..

ما اهي  لمسة ايدك وحشاها

وواحِشها شافيفك لما بتحضن شفايفها..

كوباية القهوة المظبوطة 

محطوطة مكانها وماتنقلتش ..

الدمعة على خدود الراديو لسه مانشفتش

واهي تحت الشجرة تملي هناك

شايله المنديل وبتستناك

تقسم وياها رغيف الهم

معدتش بنفسيها بتهتم

غير لما تحس بخبطة إيدك  فوق الروح

صوت الكروان بعدك مبحوح

مبقاش مسموح إنه  يغني

إمبارح كان غصبا عنى رُحت لاوضتك

خبَّطت عليك لأجل استأذن 

ف لاقيتك نايم جوايا

خُفت اصحيك 

ف قفلت القلب عليك تاني

وفتحت دولابك وانا مش عارف عايز ايه

ف لقيت الشال واقف ومحوَّط ع الموجود

كان رافض جدا اي قرار 

لخروج انفاسك من جوه

ولقيته بيخبطنى بقوة

وبيصرخ فُوق

ف لقيتك فوق 

قاعد ومربع ع الكنبة

والطرح مدلدل م العنبة

والخير كان فوق الطبلية

واللمة بتكمل كالعادة بصلاة الزين

ده بقلبك حطيت القوانين

ورميت جوانا اساس الود

وزرعت ما بيننا غيطان الرحمة

خليت الكل فى قلب اللمة يكون مبسوط

انا فاكر لما ذكرت الموت

وكتبت وصية على جِبينا

ودعيت المولى انه يعينا

وساعتها عرفت اننا هنموت

وان انت هتفضل بعدينا 

عايش دايما..

ومعطر  أيامنا بسيرتك..

شاعر_الغلابة