حوارية درامية شعر محسن العزب

حوارية درامية لروح شقيقي الشاعر المصري الكبير د. يسري العزب

_ ماشي سايبني ورايح فين؟! روحك طايرة هناك فوق أرضك وسماك وفوق أكتاف الخلق أرواحنا بتجري معاك _ رايح فين؟! _ رايح لاجل اقابل رب الخلق إسكت حبة وسيبني اعيش _ عايش عمرك وسط الخلق مش هتروح أبدا من بالهم….!! …… بالي…!! _ صورتك مش هتفارق مرة خيالهم…!! …… وخيالي…!! ماانت ياعمري علينا عليهم ………. غالي ……….. وعالي _ ياإبني خلاص سيبني وماتدوشنيش؟! واقفل يللا وراك الشيش شكلك ناسى كلامي زمان ” ياابو الريش أن شاالله تعيش تكبر لامك تبقى عريس” _ أنسى ازاي؟! وأنت اللي ليا وأنت اللي بيا يانور عينيا في الدنيا ديا _ دا انا حتة منك وأنت كمان حتة مني وابويا وامي جابوك ياروحي …….. وقبل مني _ عشان جروحي تداويها إيدك …….. تطبطب عليا _ أمانة ياإبني… خليك فاكرني أحمد يايسري : إزرع حماسي في أرض صحرا والناشفة خضرة لاجل البلد دي تقوى بيكوا وتكون بهية – وانتوا ياناسي : معدنكوا ماسي وماشفت منكوا ………. مرة أسية _ ماشي سايبني ورايح فين؟! تحت الأرض وطوبها مواهب مين هيشيل الطوب دا ياراهب؟! مين هيعلم قول الحق؟! مين هيرد الظلم بلأ؟! ‘ إوعي تفكر إنك رحت بلاش؟! إللي بيدفع للأرض دا هيا ربع اللي اديتهولها؛ مايموتش؟! _ إنت سافرت شوية وراجع نازل تحت ترابها وطالع تروي الشجرة َوعودها الفارع شايل نبض ترابها تبوسه هي كمان هتعيش حاضناك وتاخدنا…. عشان خاطرك وياك ” _ ماشي سايبنا… ورايح فين؟!