أوبرا مصر تنشر اسمي على اسم الحياه شعر سعيد شحاته

 باكتب قصيده جديده عن نفسي
مضمونها مش فاهمه
مغزاها مش واضح قوي زيّ اللي قبليها
ألفاظها تشبه عيشتي في الأرياف

شبهي قوي لحظة ما اخاف
طاهره وبسيطه ووشّها مفرود
رغم إنها كتلة عماير قلبها مسنود

على قلب ساند روحه بالتّيله

وحيطانها خايفه تنخّ بالشيله
علشان كده كل الجمل جواها ألغاز نُصها مبهم
والنُصّ أشبه بالبيوت الهيش
وجميع صورها لأوليا ودراويش

………..

غاسل إيديّا من الجرايم كلّها.. وتايب
راجع لنفسي بريء كما ولدتني بنت الطمي والطير والندى
ماشي على حدّ الصراط… هايب
لكنّي ثابت في الخطى..

 ومكمّل السكّه الغريبه وماشي باضحك للسما..

 بنتي الكبيره…

 وللبحيره الواسعه وشراع البلاد العايمه في الشرايين
اسمي على اسم الحياه،

ومحبّتي للناس ما تتقدّرش بكنوز الربيع
ماشي كأنّي مطيع وساكت رغم عنف التجربه
متدرّبه عيوني على لون القلوب الخضرا

والطرق المُريبه

 وطلّة النعناع من الجنّه لحواري المشتاقين للموت

وترحيب ربّنا بيهم هناك
اسمي على اسم الحياه..

لا باخاف ولا باقلق ولا باضّطر أقول للخاين الكدّاب معاك

مؤمن بإنّ الجوع إذا حكم البدن ساقه
ورماه في وسط جماله ونياقه
الجوع إذا اتحكّم مالوش سلطان
سكّوا البيبان واتّداروا في الأوثان
الجوع صنم مضغوط على خناقه
حلوُه المسكّر بيشبه طعم حرّاقه
قفطان جهنّم في قبضة كلّ من داقه
وشيطان إذا حكم البدن ساقه

وعشان كده
راكب حصاني.. وسكّتي رغم الدّبَش سالكه
ماشي باشوط في الطّوب وبارقص لمّا اكون عايز
وف أضعف الأحوال أنا الفايز

….. بدعوة بنت (خضرة) الطيّبه ومحبّة العصافير
شرّير في عين أعدائي…

 وفدائي ف عيون أصحابي في التحرير
وأمير في عين أمّي
وباحبّ بنت الناس شريكة دمّي وعيالي
عمري ما قلت ف يوم وانا مالي
خلفة أبويا وتربية خالي
مشوار بيعشق خطوته المشاوير

 وبيبوس القمر راسه

وبيسمّي عليه كلّ اللي شافه وصلّا واتملّا
اسمي سعيد يا ميّة القُلّه
يا دبدبات الماشي يتسلّى
يا كلّ واحد نصبّوه مُلاّ وباعوه في الحرب
الكلمه عندي رصاصه وقت الضرب
………… والكرب والفتنه
كلّ البيوت بيبصّوا من بيتنا
كلّ الشوارع حافظه كلمتنا
كلّ المساطب عاشقه حتّتنا
كل الطرق منبعها سكّتنا ورايتنا منوّره ف كلّ الحارات
متربي في الكتاتيب وفي قلوب البنات
ساكت ساعات لكن سكاتي وراه حاجات يامه
لو شفتني واقف تشوف هامه
اسمي سعيد يا قزعة القامه
راكب حصاني وسكّتي رغم الدّبَش سالكه وعيوني وساع
وان أرغموني باجيب لهم م القاع
فاحذر يا بيّاع الغلابه وفرحة الدراويش
اسمي سعيد حامد… رباية خيش
هيمان ومش قلقان من الخفافيش
صياد وعارف خطوتي من فين لفين وإزاي
اعقل.. وروّق واقعد اطفح شاي
قلبي على الراكيه لجميع المنهكين برّاد
روحي شجر في الحر والإجهاد
ضحكة ملامحي ولاد وزاد وياميش
اسمي سعيد حامد يا فرط الريش
عارف معاني الخوف من المجهول وأكل العيش
وعشان كده…

 رغم الغنا والشعر ما باغنّيش
زاهد ما يشغلنيش
عاشق ما تكسرنيش
شاهد على القباقيب وع الطرابيش
مؤمن بذاتي وذاتي فاتحه الشيش
عامل لنفسي من الوجع تمثال
وأنت اللي زيّك باعمله بقشيش
***********