أوبر مصر تَنشُر قصيدة “مفيش دليل” للشاعر جمال أبو القديم

عايش حياتي
خطوة خطوة
وسطر سطر
لا عمري نطيت
فوق حروف
ولا عمري شيلت
في قلبي خوف
ولا عمري حبيت
أبقي قطر
يجري بسرعة
مهما شال
يسيب حاجات
ويدوس حاجات
ولا عمره يرجع
للي فات
عمري ما حبيت
أبقي قطر
****
طول عمري
عايش بين قوسين
ونفسي أفهم
أبقي ايه
ولا أبقي مين
مفيش دليل
جوا الحروف
يقدر يقولي
أنت مين
غير إني أكتب
كلمتين
من غير نقط
يمكن تفهمني
النقط
أنا أبقي مين
مفيش دليل
غير إني عايش
بين قوسين
لحد ما الحبر
يطير
ويروح هناك
وأروح وراه
وهناك أكيد
لا مش أكيد
مفيش أكيد
غير إني عايش
بين قوسين
ونفسي أعرف
أبقي مين جوا
الحياة
بين ألف آها
وألف آه