كان فيها بركة .. للقاص محمد عطية
كلمة الاجيال بتتوارثها جيل بعد جيل
و كل جيل بينقلها للجيل اللي بعده . لكن بيقولها بحزن و استغراب زي ميكون مش عاجبه او بيتحسر علي ايام زمان …
و قبل يا يقولها يمزمز فشفايفه و يتنهد تنهيده طالعه من جوا قوي و هو بيقول…..الله يرحم ايام زمان كان فيها بركة .
.
تعالوا بينا كده نرجع بضهرنا لورا كتيييير و نشوف ايام زمان كان فيها بركة
و لا اهلنا كانوا بيضحكوا علينا و بيشتغلونا .
يلا بينا نشوف
الشوارع كانت فاضية …
ايه دا و المواصلات رايقه …
الله الله !! و الناس كمان
هي الناس راحت فين ؟
يعني المشوار من اول شبرا لحد العتبة هو يا دوب عشر دقايق ..
الواحد يخلص شغله و يرجع الساعة اتنين شايل البطيخه و الجرنال تحت باطه.. يكون في بيته الساعة اتنين اتنين و عشرة بالكتير…
يتغدي و يرتاح شويه بقت الساعة خمسة …
يلبس و ياخد العيال و يروح عند اخوه فى العباسية بقت الساعة خمسة و نص .
يقعد معاه و يتعشي و يحلي و يرجع شبرا تاني علي الساعة تسعة و نص بالليل .
العيال يطلعوا و هو يقعد علي القهوة نص ساعة قول ساعة يشرب فنجان قهوة ولو كان بيشيش يشربله حجرين معسل و يحكي مع اصحابه و هو بيلعب عشرتين طاوله .
و يطلع يغير هدومه و ينام علي الساعة عشرة و نص .
دى بقي كانت البركة فى الوقت ايام زمان …علشان الدنيا كانت رايقة و عددنا صغير
كان فيه كمان بركة في الفلوس ….
ايوه بركة في الفلوس مستغربين ليه ..
طب تعالوا احكيلكوا علشان شكلكوا مستغربين ومش مصدقين ..
زمان و انا صغير كان مصروفي عشره صاغ في اليوم..يعني بريزة اللي هي عشرة قروش ..
و كنت بحوشها كلها لاني باخد معايا الشندوتشات و انا رايح المدرسة .
فضلت احوش احوش احوش لحد ما بقي معايا اربعين جنية حته واحده ..
اشتريت بيهم خاتم دهب هدية لامي في عيد الام ..
.
طب خد دي ..مرتب امي زمان كان سته جنيه بس ..
و كنا بناكل احسن اكل و نلبس احسن لبس …
بالمناسبة اللبس مكانش من الغالي بس كان اخر شياكة و كنت اشيك واد في البلد ..
و امي كانت بتحوش من المرتب كمان ..
و كانت بتعمل جمعيات و بنينا بيت في البلد من فلوس الجمعيات دي .
الفلوس زمان كانت بتكفي و تفيض لان كان فيها بركة .. و البركة دي جاية من حاجتين كانوا موجودين زمان .
القناعة و الامانة
كان كل واحد عنده قناعة و راضي برزقه و بالمقسوم ليه و مش بيبص للي مع غيره ولا يفرق معاه خالص .
و كانت الامانه و عدم الجشع صفه في التعامل يعني مكنش حد بيستغل طيبة حد تاني و يضحك عليه او يستغله من باب الفهلوه و انه مفتح و برم و بياكلها و هي والعه .
علشان كده كانت الفلوس فيها بركة .
.
يلا بينا بقي نتكلم عن البركة اللي في الصحة .
هتقوللي ايه دا هي الصحة زمان كان فيها بركة ؟
طبعا دي بركة الصحة دي من البركات المهمة جدا …
تخيل انت واحد بصحتة ممكن يعمل ايه؟ ….
و واحد الصحة عنده بعافية شوية هيعرف يعمل ايه؟
نرجع تاني لزمان …
واضح ان كل حاجه زمان كان فيها بركه حتي الصحة كانت زي الفل
لا فيه تلوث في الهوا من دخان المصانع ولا دخان شكمانات العربيات .
و لا فيه تلوث في المياه من مخلفات المصانع برضوا .
كان الواحد يصحي الصبح يفطر فطار نضيف ..
يشم هوا نضيف…يمشي شوارع نضيفه
و مفيش كيماوي في الزرع ..
الزرع كان اورجانيك
وعلي رائ الفنانه يسرا الطبيعي يكسب …
و مكنش فيه لا دش و لا ستالايت شغال ليل نهار ..
كانت الناس تصحي بدري و تنام بدري ..
كان الجسم بياخد كفايته من النوم الصحي الطبيعي..
طب بالله عليكوا مش كان قرص ريفو بقرش تعريفه بيخلص علي اجعص تعب و صداع .
زمان كان فيه توازن في كل حاجه … فالصحة كمان كانت متوازنه ..
و كانت الناس ماشية وشها منور ..
زمان الصحة كانت فيها بركة .
البركة زمان كانت في حاجات كتير لو اتكلمت عنها الكلام مش هيخلص .
لكن بدعي ربنا ان في الايام اللي جاية البركة ترجع تاني لما الناس ترجع تحب بعض بعيد عن المصالح .
لما الناس ترجع تاني تقوي العلاقة بينها و بين ربنا .
لما الناس تبطل غيره و حقد .
لما الانسان يرجع تاني يبقي انسان .
