ساحة الإبداع
شريف أنيس يكتب وحيد بين الغاليين
عدوا المواسم وادعولي
أنا البطل أبو قلب وحيد
كام عيد ولساني بطولي
لا حد يسأل ولا يعيد
تزيد على الضهر حمولي
والرحمه تنقص مش بتزيد
أصعب علي الناس يدعولي
وقلبي رغم الوحده عنيد
الخلق حواديت بالألوان
وشوش تلازم ترحالي
فيها اللي يلمع والبهتان
والكل حالهم من حالي
الغربه ترسم ميت عنوان
والريح بتخطف أوصالي
والقلب شايف ألف مكان
والروح ترفرف ف العالي
فات النهار وانا لسه بطير
ويلوموا ف البعد جناحي
إزاي يرفرف عشمان خير
رغم الوجع لساه صاحي
لا قلبي يشبه قلب أمير
والحلم يسرق أفراحي
يحدفني طوبه لباب أمشير
والليل يتيم زي صباحي
أنا الوحيد بين الغاليين
وشي الحزين عامل فرحان
مكياجه مل من التلوين
واللوحه كرهتها الألوان
أبان ف وقت الفرح حزين
غريب وتايه ف العنوان
والبحر برمي ف قلبي أنين
ويفيد بإيه صمت الغرقان
