متولي بصل يكتب يوميات رمضانية (أغلى طبيب)

يا عم رمضان لسه بدري
وانت زي الخيل بتجري
إزاي وصلنا ليلة عشرين
والهلال بقى بدر بدري
هو احنا كنا يا ناس نايمين
يفوت علينا ومش حاسِّين
نفسي تدوم وتطول أيَّامك
تبقى شهور وسنين من عمري
يا اللي كتير تواسيني بصيامك
مين بعدك هيطيب خاطري
شهر الخير والله بقيامك
بيزول همِّي ويرتاح فكري
بيبان – قبلك – قلبي حزين
وهمومي فيه زي السكاكين
وامَّا أقابلك يوم واتنين
قلبي يطير م الفرحة في صدري
تعرف إنك أغلى طبيب
وان دواك مفعوله عجيب
والعيَّان اللي ما لوش دوا
بيخف على إيديك ويطيب
فبلاش تبعد قوي وتغيب
وتزود صبرين على صبري

ساحة الإبداع – أوبرا مصر