( لك يوم )

رمضان شهر الإحسان
والكلمة لازمها ميزان
فكَّر قوي فيها
قبل ما ترميها
وتصيب إنسان
ما هو سهل تلقَّح
واسهل لك تجرح
مش صعب عليك
تجرح بإيديك
وتصيب بعينيك
أو تؤذي بطرف لسان
وانت مفكَّر نفسك أستاذ
والناس حواليك شبابيكها إزاز
لك يوم دمَّك يتعكَّر
لمَّا إزازك يتكسَّر
وتلاقي حالك متبعتر
وتقول وقتها ندمان
ندمان أو مش ندمان
اللي اتجرَّح واتهان
بالزور أو بالبهتان
لا هيرجع زي زمان
ولا هينسيه نسيان
وهتفضل عنده شيطان
مش أي كلام يتقال
فيه كلام بيهد جبال
والكلمة اللي ما بتصيبش
زي ( الشقرف ) بتحش
وتسيب علامات في الوش
وتدمَّر في الوجدان

ساحة الإبداع – أوبرا مصر