أغلى الحبايب

يا عم رمضان لو تقدر
قبل ما تغيب زي عادتك
وتفارقنا
قبل ما انت كمان تسيبنا
روح لأغلى الناس وشوفها
بوس إيديها
روح لها وسلِّم عليها
وقول لها ..
مشتاق ورب الكعبة ليها
*******
ليه طول ما نعمة ربنا ..
قدامنا ..
مش بنحس بيها ؟!
و لما بتضيع مننا ..
نقضي اللي باقي ف عمرنا..
نبكي عليها !!
لا بتقف الأيام .. و لا بتهدا السنين !
و اللي النهارده بينكسر ..
عمره ما بيرجع سليم !
و اللي بيقع .. بيدوس عليه ..
كل اللي رايح ..
و اللي جاي !!
الدنيا قاسية
الدنيا عمر ما حد يوم ..
صِعب عليها !
مين كان لي فيها ؟!
غيرها هي تخاف عليَّ
تسقي ورود عمري
بإيديها
و اللي كنت انا ..
مهما أتعب والا أعيا ..
كان دوايا ..
نظرة واحدة من عينيها !
دنيتي .. عمري .. حياتي
شمس أيامي اللي راحت
واللي جاية !
بدر لياليَّا ..
اللي كل الفضل ليها
ضاق الفضا
و اسودِّت الدنيا ف عينيا!
يوم ما ودَّع قلبها قلبي ..
و فات !
عمري انقضى ..
و انهدت الدنيا عليَّا
أتاريني كنت ف جنة ..
وانا فرَّطت فيها
ما املك أنا دِ لوقتي
غير الذكريات
يا عم رمضان لو تقدر
قول لكل الناس تحاسب
الدنيا مش بتدوم لحد
واللي عنده أمه عايشة
يبقى في الجنة ونعيمها
هو فيه في الدنيا زي الأمهات

ساحة الإبداع – أوبرا مصر