أوبرا مصر تنشر “هزيمة كومبارس” للشاعر جمال جراحي
قادر تكدب على نفسك
كل السنين اللي فاتت
وبتعدى للي بعدهم بهدوء
تتأمل الوشوش حواليك
تأدى دورك ببراعة
مجرد كومبارس
بتشوف نفسك
في عدسة الكاميرا خيال
تمر على السطور
تاخد من كل كلمة حرف
تكمل الجملة اللي ناقصة
وتنتظر اللي هيقولك
سكوت .. هنصور
خد مكانك فى المجاميع
التزم بالمكتوب لا تقدم ولا تأخر
أتحرك فى إتحاه الضوء
صورتك وحشه والكاميرا مخاصمه وشك
خط طويل بيظهر فجأة في المراية
من رحيلك
لحد ضحكة باهتة فى خلفية المشهد
الحلم أكبر من العواطف
صدقتني …..
مش وهم
ولا مضحوك عليك
انت اللى فهمت أن الحياه بتبدأ
من شخطة الريجاسير
لما يصرخ فى وشك
انت جيت هنا غلط
شفت اد ايه حجم الهزيمة
ودلوقتى انت مغصوب ترجع
من أول السطر
تشيل المساحيق من على وشك
وتلبس هدومك القديمة
وتمسح دموع خسارتك
ما تزعلش
أنت ما كنتش ممثل كبير
كل الحكاية
أنك كنت فى المجاميع
مجرد كومبارس
