كرٌاس شعر فاطمة الصعيدي

كرٌاس
حاولت اكتب جواب يابا
عشان الوَحشة حاسّاها
وِوِحشة الدنيا من غيرك
ومين غيرك دة حلاها؟
بدوّر ف الزمن واسأل على كرّاس
لقيت نوتة بغلاف كرتون عليه إسمك
وِ وَرقة مزخرفة فاكر كانت رسْمَك
وأول ما القلم سلّم على الورقة
دموعه سيول
وِحبره الطافح اتبخّر بقى فاضي
ومُش راضي
وِورقة ف نُص أوراقك
لقيتها مسجّلة المشهد
قالت أشهد
بحنيّة كفوف إيده
على القلم اللي أسنانه
دي ضايعة من سنين فاتت
أكيد ماتت…
مشاعر جوة كراسك
قامت ثورة
ومعترضة
ورافضة تمحى بصماتك
قلم تكاية كان ف إديك
مطبّع بصمة جار بصمة
وشمّاعتك.
بقالها م الزمن مُدة
مكانها واقفة تستنى لكام هِدمة
بحطّت إيدَك الطاهرة
دا طربوشك
وشَعره بتوحشُه الفَرشة
سألني إيه اللي بيحوشك؟ وشالك اللي كان ف البرد على كتفك
ينوّر لمّا تتلفّح وتتدفّى
يابويا مالت الكفة
وطبّت بس بالمقلوب
بقيت مغلوب
وبامسح دمعي ف هدومَك
يطبطب عطرَك الفوّاح
وباستنى يابا قدومك
يا أغلى حد راح وارتاح
باناجي ف لِيلي سهرايتُه
وبادعي الصبر على بُعدك
أنا والله من بَعدك
حاولت اكتب ولو كلمة
واقول مثلًا حياه تِلمة
ورافضة تفوت
ماعرفتِش
ف قُلت أبوح وأتكلّم
يعدّي الوقت بيّا سكوت
ف سلّمت الورق قلمك
وكراسك
وماكتبتش