محمد رضوان يكتب زمن اتغيّر… وقلوب بقت غريبة

إحنا عايشين في وقت غريب… وقت الواحد فيه بقي محتاج يبص حواليه ألف مرة قبل ما يدي كلمة، أو يفتح قلبه، أو حتى يصدق ضحكة. زمان كان الودّ طريق واحد، وكان الناس بتسند بعض، لكن دلوقتي بقى الطريق منقسم، والقلب نفسه بقى يشيل همّ قبل ما يحب. كإن الزمن قرر يختبرنا، يشوف مين اللي لسه ماسك في إنسانيته، ومين سلّم نفسه لغلّ الدنيا.

النهارده بقينا نشوف ناس بتتنازل عن أصولها علشان توصّل أسرع… يكذبوا على نفسهم قبل غيرهم، ويتزينوا بزفة وهي أصلاً فاضية من جوّا. سواد غطّى القلوب، وعمى خلا ناس كتير مش شايفة غير نفسها، ولا همّها غير إنها تكسب حتى لو غيرها وقع.

والملفت إن اللي عمّاه غروره ماشي وهو فاكر نفسه كبر… مع إنه ماشي في خراب. يعيش سنين طويلة وهو مكسور من جوّه، بس مغطي ده بمنظر وقوة كاذبة. كإنه مش شايف إنه خسر أهم حاجة: راحته مع نفسه.

وقصة قابيل اللي اتقالت من آلاف السنين، للأسف بتتكرر قدام عنينا. أخ يقتل أخوه، مش بالسلاح بس… لكن بالكلمة، بالموقف، بالظلم، بالحقد. قلوب كتير بقت غريبة، مش بس عن بعضها… لكن غريبة عن فطرتها اللي اتولدت طيبة.

بقينا نشوف ناس بتاكل تعب غيرها، وتاخد مجهودهم كإنه حق مكتوب ليهم. الجشع عند بعض الناس بقى زي المرض… ساكن في الدم، ما يعرفش يشبع. وبدل ما يبنوا شغل من عرقهم، بقوا يخربوا شغل اللي حواليهم.

الدنيا بقت زي مركب مليانة بأخطاء البشر، وماشية من غير شراع يهديها. والناس، بخوفها من الأذى، بقت تبني أسوار حوالين نفسها: سور من الحذر، وسور من السكوت، وسور من البُعد. كل واحد خايف ينجرح، خايف يتهان، خايف يكون طيب في زمان بيكافئ القاسي.

أرض كانت زمان مليانة سلام، بقت تنزف من كتر الحروب اللي مش دايمًا بمعنى السلاح… ساعات الحرب تبقى كلمة جارحة، غدر من قريب، خيانة من صاحب، أو ظلم من حد كنا بنعتبره سند.

والسؤال اللي كل واحد فينا بيسأله نفسه: ليه الكره بقى سهل؟ ليه القلب بقى يملأه الظلام أسرع من ما يدخله نور؟ ليه الحب بقى نقطة… بالكاد تظهر، بينما الكراهية بقت بحور؟

الحقيقة إن الطمع بقى سيد، وصوته بقى أعلى من أي صوت تاني. كإن النفوس أدمنت الأذى… بتسمعه وتصدقه وتحبه. لكن رغم كل ده، الخير لسه موجود، حتى لو مستخبي، حتى لو مش ظاهر قوي. الخير مش بيموت، هو بس بيرجع خطوة الورى… يستنى حد ينادي عليه باحترام.

إحنا مش محتاجين معجزة عشان الدنيا تتعدل. محتاجين نبص جوانا، نفتكر أصولنا، نفكر نفسنا باللي اتربينا عليه. لأن أصعب حاجة في الزمن ده مش إنك تفضل كويس… أصعب حاجة إنك تفضل كويس وسط كل اللي حواليك.

في زمن كله أقنعة، وكل يوم كشف جديد، يفضل أنضف قلب هو قلب اللي ما تغيّرش، اللي لسه فاكر إن الإنسان إنسان… حتى لو الدنيا كلها قالت العكس.