إضحك

إضحك لو ضحكه غلب
وإغلب خوفك بقلب
وإقلب ميت صفحه حب
وإحلم لو حتى كدب

سافر عافر وعيش
علم روحك تطيش
وإضحك لو ع المفيش
وإخلق جناحات وريش

فتش كل الموانى
عن دنيا وحلم تاني
لو عمرك كان ثواني
متكونش ف يوم أناني

هزر من غير هزار
وإرسم ع الكف دار
خلي الأحلام قرار
وإتنفس نور ونار

كلم كل القلوب
واسمع وإفرح ودوب
لملم حزنك وتوب
وإتدارى ف كل توب

متلومش على اللي راح
بعيون مفهاش سماح
قوم من بين الجراح
رفرف وسط البراح

لون شكل السنين
بملامح فرحانين
واكتب بحروف حنين
وإياك ترجع حزين

إضحك منتاش حجر
ولا طيف فاته القمر
وإرسم وش الشجر
بوشوش وقلوب بشر

إضحك لو ضحكه غلب