العرض مستمر شعر : يس النحايفة

تعلن دقّات المسرح عن فتح ستار الدنيا لرواية جديدة تراجيدي وكوميدي والمتعة أكيدة .. منظر ( 1 ) طفل مغمَّض عينه حَيا ويا دوبَك يِرْمِش علشان يتنفِّس نسمة ضي تكفِّي يعيش والضيّ عَبوس وضَنين وبيخنُق فيه يتمشَّى بعرض الخشبة ببطء مُتَكلِّم ويخاف النُطق رغم انه بطل فِ العرض من حقُّه يقول ويصول ويجول ويمدّ ف رجله لسابع أرض لكنه خجول مستغرب كل الناس وف وسط الزيف والصوت العالي ال مش محسوس يلجأ لكالوس يخفيه م النور لو بَرْق ! ويكِنّ يئِن ف دمُّه الفَن ويزأر ويسكِّن خوفه ويدخُل جوه المنظر .. منظر ( 2 ) الطفل كِبِر مليان بشباب وخياله عجوز والرأفة برقِّة حالُه تجوز الحيرة أسيرة ف رُكن ف بالُه وضلام جواه بيكتِّف عزم النور بحبالُه تتيتِّم ذاتُه ويكمِّل دوره ف عرض حياته بآداء مهزوز .. منظر ( 3 ) الشيب استوطَن فِ سوالفُه والعمر شريكه بقى مخالفه في ملامحه سايب علامات الوصف .. وحيد والخطو .. وئيد وعيونه ما بتعرفش العيد ! بس بتعرف تقرا قلوب الخلق وتوَصَّل نبض الخوف للحَلْق لو تتخيِّل ان العرض ساعاته تطوِّل او يمكن يتعاد م الأوِّل ! ( نهاية ) العرض بيكمَل فِ الكواليس ………!