الغياب شعر: عفاف ترك

الغياب.. كان انتظار طال حبّتين..
كان ارتجال عشوائي محجوب العينين..
كان اصطفاف المرحلة جنباً.. لجنب..
كان انتظار المغفرة من كل ذنب..
كان كل حاجة مش فاكرها.. بتوحشك
لمّا خاناتك تزنقك.. بين ١٠٠٠ بين
…
الغياب.. كان شوقك اللي مبعترك..
كيل وفاض به.. دفترك..
لطعتك.. على باب حبيبة من الخيال
وقفتك..علي رِجل واحدة.. كإحتمال
فكرتك..لو يوم نسيت رأس السؤال
واللفلفة حوالين ذوات المعضلة..
والبيع جذافاً.. كل اللي عايز يخسرك
…..
نفسه الغياب..
بين طلّتك على نبرة شالت حكمتك..
وعِرق طيش..
بين حِسبة كل ما تجمعك على حد
تطلع ما تساويش..
يعني المساحة والمحيط..
ناتج.. من الجنس العبيط..
لما بتضُم بضلوعك دنيتك علشان تعيش..
……..
أنت الغياب..
أنت انتحارك كل يوم على فرشتك
أنت انسحابك م الصور.. لو عرفتك
وانت ابتعادك عن معالم.. سكّتك..
وانت العشم.. لمّا الحياة بتأتتك
فبتكتشف.. وبسخرية..
ان الشواهد كلها.. بتشير إليك..
واللي قدّام المراية.. بهيئتك..
سطرين غياب.. والفصلة. . بينهم
..( حضرتك).