أوبرا مصر تنشر كوباية البن للشاعر هاني النجار

دورت في كل اصاحبي عليك قالوا مابيجيش وسألت الناس هنا ع القهوة رد القهوجي وسألني سؤال! قال فين ايامكم يا جماعه وفين البقشيش رديت وانا كلي كسوف منه معلش يا ريس تتعوض بكره الأيام ترجع تاني أنا عارف صاحبي وألاعيبه بيلف يلف وبيجيلي دا مبيسيبنش؟ وقعدت في نفس مكانا هناك وطلبت الشاي ويا القهوة وكأنك قاعد ويايا وفضلت احكي لك عن حالي واستغرب انك مش بترد وبتسمع من غير ما تناقش ف احكي لك وازود اكتر عن ضيق الحال ومرار العيش واستني اسمع منك كلمة كوباية البن ترد تقول لي كفاية حرام قلبي.اتقطع دا لا صاحبك جالك ولا شافك ولا حاسس اصلاً احساسك ايه ذنبي تجيبني وميدوقنيش وانا قاعد مشغول في كلامها جاني الاقهوجي قال تطلب ايه بصيت له ومستغرب منه متقول لي حسابك اامرني قال لي انت ماخدتش حاجه يابيه رديت ازاي طب والقهوة وكلامها معايا وحكاويا كل ده كان ايه قام رد وقال كان حلم يابيه وبدأ يدعي لي ويدعي لك ربنا يجمعكم من تاني ولا يحرمكوش أبداً من بعض وياريت لو صادف وقابلته ترجعوا تقعدوا هنا من تاني ومتحرمونيش رديت والحزن مقطعني بالله لو شفته تطمني وتقول له ان انا دوخت بدور علي نفسي في شخصه ومالقيتنيش