ساحة الإبداع
أوبرا مصر تنشر باجيب سيرتي شعر: سامح هريدي
باجيب سيرتي وأنا قاعد مع نفسي
وبتكلم معايا عني فى غيابي..
وأفضفض ليا عن حالي وأقول نفسي
تكوني يا روحي كل صحابي وأحبابي..
بعاتبني في يوم ما أغلط
وأحاسبني عشان م أغلط
وألومني كمان وأخاصمني
وأصالحني في يوم ما اعرف
بأن الغلطة مش ممكن هتتكرر..
بكلمني بصوت عالي
وعمري عليا ما أتعالي
وساعة ما أبقي وحداني
كلامي معايا يحلالي…
ساعات بزعل أنا مني
ومني بنجرح أوقات
لكن عمري ما أغيب عني
ولا أبعد عني في الازمات..
بكلمني بصوت مسموع
وأطيب خاطري لو موجوع
بكام معلش في الاخر
وبقفل بيهم الموضوع..
وأكلمني كتير بشويش
وأقول لى لايمها لاجل تعيش
وأصبرني على الايام
بكلمة كل شئ مكتوب
و عيش وأسكت
ومتلومنيش..
