قصيدة كفرت بكل أحوالك شعر رضا أبوشنب
قصيدة ( كفرت بكل أحوالك )
كفرت بكل أحوالك
ومالي لما كان مالك
كفرت بشعرك الأبيض
وليلك الأسود الحالك
وانا والمر جوايا
بقولك روحي ابقالك
كتبت الشعر علشانك
وبوزن نفسي بميزانك
بحب عنيكي والضمة
وبسمع حتى بودانك
بحس بدقتك يا امه
وعايش جوه فنجانك
ووسط الهيصة واللمة
بقولك يا امه خدامك
بلاش ياما تحا سبيني
وحاسبي كل من خانك
ومن خلاكي ترميني
ومين قطع في أوصالك
بتسقيني دموع عيني
وأنا في الأصل خيّالك
قوليلي يا امه فين عمي
ومين يبقى البعيد خالك
باشيلك جوه في النني
وهو يعيش على مالك
بلاش يا امه تعاتبيني
وعاتبي كل عزالك
ولو هتحاولي تحكيلي
قوليلي يا امه فين شالك
قوليلي يا امه فين دهبك
ومين بيهز خلخالك
قوليلي يا امه لو فاكرة
في وقت الشدة مين شالك
مابين التوتة والساقية
بيطلع منها موالك
بشوفك في الوجود باقية
يا غالية وربنا زادك
بحبك وانتي مش رايقة
بحبك وسط عزالك
ومهما تكوني متضايقة
باقولك يا امه محتاجك
واسيب الهيصة واللمة
واقولك يا امه خدامك
واقولك يا امه لو فاكرة
في وقت الشدة مين شالك
في وقت الشدة مين شالك
