ساحة الإبداع
بحور الشعر شعر ماهر أبو المعاطي
![بحور الشعر شعر ماهر أبوالمعاطي](https://operamisr.com/wp-content/uploads/2022/08/297036199_1096200667942871_6598865120890323446_n.webp)
بحور الشعر
…………………..
مجنونة الفكرة اللى بتتشكل
وتشكل كل حروف النظم
على قد مقاس الحلم
اللى بيبدأ
من أعلى الراس
حد القدمين
أنا مين
دور على نفسك جواك
ولا تحلم مرة إلا معاك
أفتح دولايب الشوق البهتانة
دور على ماضى
الحلم الفاضى
متعود دايماً
يتكرمش بين الأوراق
أصل العشاق
من بعاد نفاذ أرصدة الحب
بيدق القلب دقات عيانة
تبقى الكلمة الحلوة شحاتة
يبقى مجرد شوقى إهانة
اسأل كل حيطان البيت
عايزانى
اسأل تانى
أستنا الرد
ده بقايا الود
أيام تتعد
عداد أنفاسك
هيدادى بقايا احساسك
ويطبطب على جرحك لا ينز
والدمع يعز
ماهى أصل عيون الرجالة
بتحرن عالدمع
بنحوش كل دموع العين للغالى
والغالى عند الرجالة
حدود وبلاد
دم الأولاد
الدمعة بتنزل غصب
لو تيجى سيرة الشهدا
فى دقيقة حداد