ساحة الإبداع
عفاف التركي تنزف شعرا قصيدة جديدة
قلت له
قول الشعر علي كيفك ..ومتّعنا ..
دي ضحكة واحدة من حرفك..بتوجعنا
وأي كلام هنا يتقال ..يصيب القصد والمعني
قول يا زعيم ولا تخبيش في جيب الشعر تعريفه
وقول مهزوم رغيف العيش .. يروح ويشوف له تصريفه
وقول عنّه.. كلام بطّال ..
عشان ما يغير علي دمه الكلام فنقول وتسمعنا ..
دا نُص الشرح ع الفاضي.. ونُص الشعر في المليان
نداري كعبه ..مش راضي .. نعّري الكتف بالمجان..
ونرسم وشّه بالطباشير .. فيدخل عينّا بالالوان
وقل لي كمان …
صحيح الحال دا غير الحال؟؟
صحيح خصموا اللي باقي رصيد لبني ادم ..وفتحوا مجال؟؟
صحيح هانوا اللي كان مستور ..؟
وقطعوا الغاز وقطعوا النور..؟
وبقت في وداني تنويحة (موعودة ياللي عليكي الدور )؟
قول بصحيح ..يا سي حمدي
كل الماضي كان عنده..ليه بكرة ماهوش عندي ؟؟
قول قبلي .. وقول بعدي .. ومين من قولنا يمنعنا؟؟
دا عـرق السطر لو يُنفر ..في وش الازمة يمحيها
والحامل في ست اشهر .. مافيش تأويل ينجّيها
و شعب الروس .. وسوفيته.. وسلطاته ..واسلحته
نبوءة حرب معتبرة .. مافيش غيرنا يعدّيها
قول والمولي يفرجها..نساند دُوله ام دوكها..؟
ونعزقها ..ونهلكها..تنبّت قمح ..تشبعنا ..
بكرة نعد مراكبنا ..
ونتغنّي،بمواكبنا..
وثور الله..وبرسيمه..وشعب ربنا ..(و احنا)..
ومختاره..وتجريمه.. وحنيّة ملامحنا..
..وربيع عربي..وقصة حب..وطفل حجارة ..وتجارة..
مابقاش،في الكون ولا سنتي.. نِسِد ودانه ويساعنا
قول يا زعيم …
قول للشجرة مال جدرها مخوّخ ..؟
تهِب الريح نلاقي فروعها بتدروخ.. ؟..
مين وصّي،ما نقطعهاش..؟
قول للشعر .. يا تستجدع يا اما بلاش..
وجيب الشِعر من ذيله.. ولو زهقان نغني له.. ما يقرفناش
قول له كمان.. يحافظ عاللي فيه الروح..
ويعرف موطن الآهة .. ينيّمها ما يقلقهاش
ويحاجي علي الباقي في كرامتنا ..ما يهدرهاش
ويتعنطز علي كيفه ..ويحط الرجل ع التانية
ويطلب احلي شاي بحليب…
ويحاسب علي المشاريب
كما العادة..
قوافي،الشعر كيّادة .. وشيطان الشعر بغزالة
فبدون ما نفنّط الحالة ..
قول الشعر ..ببسالة ..
واحنا صفوف حروف مدفع ..
وفرقة صاعقة قوّالة ..
