أوبرا مصر تَنشُر كنز الحواديت …. فيها حاجة حلوة .. للقاص محمد عطية

النهاردة بقى و على غير العادة صاحي من النوم بدري و أخر نشاط و حيوية مع إني نايم متأخر 
 بفتح عيني لقيت الساعة ستة و عشرة.. إتوضيت و صليت ركعتين الصبح و فتحت الراديو علي إذاعة الشرق الأوسط و الست كانت زي كل يوم بتغني و تقول يا صباح الخير ياللي معانا يااللي معانا .
      و بسرعة كالعاده مسكت الموبايل و فتحت الفيس بوك بتاعي علشان أعرف أخبار الاصدقاء 
و كالعاده محدش عبرني بلايك حتي علي بوستات إمبارح اللي كتبتها طول الليل. عادي و لا يأثر فيا أصلاً  
 لبست الترنج و قلت أنزل أجيب بجنية فول و طعميه أفطر بيهم من عند عربية الفول بتاعة حسونه اللي على ناصية الشارع . 
كانت الساعة سبعة الإ ربع كده 
_صباح الفل يا معلم حسونه 
صباح الفول يا أبو إبراهيم.. خير يعني صاحي بدري ليه؟ اوعي تكون نمت علي الكوبيستة النهارده…. 
إتلم يا حسونه هو أنت فاكر إن كل الرجالة زي حلاتك و لا إيه ؟ 
بهزر معاك يا أبوإبراهيم.. أصل انا مستغرب إنك نازل بدري بس و الله إنما أنا بعزك زي أخويا و الله 
. ربنا يديم المعروف يا حسونه..

طبعاً الحوار كان قدام كل الناس اللي واقفه تفطر على العربيه . 
بصراحة المنظر يفتح النفس خلاني أقول لحسونه يحضر طلب فول و فلافل 
حسونه جهز طلب فول بالزيت الحار و قرصين طعميه محشيه , أنا هفطر هنا وسط الناس الحلوه دي
قالي حالاً يا باشا و هو بيجهز الطلب قعد يغني و يقول 
.
دا طبق الفول….. مفعوله مفعول 
ينزل ع المعده يجبسها 
.
لا تقولي باتيه… و لا ابصر ايه
و لا اي بديل غيره ونيسها
.
حبة كمون….مع فص لمون
هات شوكه و قوم ياله اهرسها
.
بالزيت الحار … قاسي و جبار
و ربك هو اللي حارسها
.
خد بصله ف خل 
صباحك فل
دي زبايني انا اصلي دارسها 
.
دا طبق الفول.. مفعوله مفعول
ينزل ع المعده يجبسها .

الكل قاله الله عليك يا حسونه يا جامد 

و لسه هاكل لقيت عامر القهوجي بينادي عليا من الناصيه التانيه .
_ صباح الجمال يا استاذنا اصطباحتك زي الحليب إن شاء الله يا أستاذ . 
رديت عليه الصباح الحلو دا و شاورتلوا بايدي 
قالي وجب كباية الشاي المعتبر لأجدع أبو إبراهيم في المنطقة تمن .
و الله أنا حسيت بسعادة كبيرة و انا وسط الناس ولاد الحته الطيبين .
 المهم و انا بأكل الفول من الصحن الألمنيوم شاب كان جنبي لقيته بيبتسم و يقللي إتفضل يا عمو قرن الفلفل دا طعمه رائع. انا أبتسمتله انا كمان و قلتله شكرا يا. يا..يا 
 قالي أنا ميدو جاركوا اللي في البيت اللي جنبك و بشوفك في الجامع و بشوفك وأنت راجع من الشغل.. إنت مش فاكرني يا عمو… دا أنت و انا صغير كنت بتديني أنا و العيال اللي في الشارع بونبوني .  
 عملت نفسي فاكر و قلتلوا أيوه إفتكرتك يا ميدو عامـــل إيه ؟

سيبني أكمل أكل بقا…. و كلت لقمة فول و معاها قطمة من قرن الفلفل بس كانت قطمة بعشم حبتين.

ماهي من الولد إللي عارفني و كنت بديله بونبوني
و مع القطمة عشرين لطمة… يا مطافي الحقيني..

قرن الفلفل نار يا حضرات
محتاج شفشق ميه يطفي النار . 
ميدو كان بيعمل معايا واجب و ماكنش يعرف إني مابحبش الشطة و لا الفلفل الحار . 
كل اللي واقفين بصراحه كانوا زي الفل جابولي ميه و كرسي أقعد عليه . 
همه دول الناس الطيبة اللي يقفوا جنبك حتي لو المشكلة كانت في قرن فلفل حامي . 
فطرت الحمد لله و شربت الشاي التمام و قلت أطلع ألبس و اروح الشغل زي كل يوم 
و زي ما قلتلكم اليوم باين عليه حلو من أوله . 
 لقيت أبن واحد جارنا هو واد صغير واقف قدام البيت و ماسك بونبوناية و أول ما شافني جه جري عليا و سلم و باسني و قالي إتفضل يا عمو أنا بحبك قوي. و كنت مستني حضرتك و إنت نازل رايح الشغل مخصوص علشان أديلك البونبونايه دي .
بصراحة انا حضنتة و قلتله و البونبوناية الحلوه دي بمناسبة إيه ؟ 
 قال لي علشان إنت يا عمو إمبارح و إحنا طالعين علي السلم النور بتاع السلم كان مطفب و أول ما سمعت صوتنا نورت نور السلم و فتحت الباب و سلمت علينا و قلتلنا إتفضلوا.. علشان كده أنا إديتك البونبوناية
 أنا سمعت منه الكلمتين دول و قلت في بالي ياريت العلاقات الاجتماعية دي تكون بينا كلنا و نزرع الحب و الالفه بين كل الناس
و إن الجميل في إللي أجمل منه 

يااااا البونبونايه دي خلتني أقول ان لسه فيها حاجة حلوة