ميرهان حسين : فكرت كثيراً اعتزال الفن بسبب الظلم وعدم التقدير
كتبت : سلمي الكومي
قامت الفنانة ميرهان حسين، بنشر فيديو لها علي صفحتها الرسمية بموقع انستجرام من برنامج “صاحبة السعادة”، و كتبت : “أنا أول مرة أقولها أنا فعلا فكرت كتير جدًا اعتزل العمل في الفن لأني كنت شايفة إني مش متقدرة واتظلمت كتير في هذا الوسط الذي لا يمنح النجومية حسب الموهبة لأ للأسف بيخضع كتير للعلاقات الشخصية و بيفرض ناس لا تستحق ويعطي فرص كبيرة لناس تكاد تكون معدومة الموهبة”.
تابعت ميرهان تعليقها “وأنا عانيت كتير من إحساسي إني استحق فرص أكبر وأكثر تنوعًا في الوقت اللي كان بيتم اختيار شخصيات لأداء ادوار عظيمة لا تشبههم شكلًا ولا مضمونًا لمجرد صداقة فلانة بفلان واحتضان مصر لغير الموهوبين من جنسيات اخرى مع احترامي التام لأي جنسية، وأي فنان أو فنانة عندهم موهبة ولايقين في الأدوار اللي بيقدموها وبيعملوا المجهود اللازم لأن التمثيل ده مش مجرد وقوف امام كاميرا لأ ده عمل شاق من التخيل والمذاكرة والتقمص والتحمل والصبر وكل ده على أمل التقدير”.
وقد أضافت ميرهان “أنا ماكنتش عايزة غير تقدير وإعطائي فرص أقدر أعرض فيها أدواتي كممثلة ومغنية و قادرة على تقديم أعمال استعراضية وده اللي كان اساس اختياري في برنامج ستار أكاديمي في لبنان وإيمانهم الشديد أني أملك العديد من المواهب اللي تؤهلني للتقدم في صفوف النجومية خاصة في بلدي مصر”.
وقد اختتمت تعليقها : “حقيقي أنا مش عارفة أقول إيه على كلامك عني، ورأيك في شهادة عظيمة جدًا في حقي لأنه مش أي رأي ده رأي واحدة من القليلات الفنانات العظيمات الرائدات كممثلة كوميديانة ومنتجة كبيرة ذات خبرة طويلة وكبيرة في تمييز الموهبة، والأعمال الناجحة شكرًا من قلبي يا صاحبة السعادة على استقبالك الجميل ليا و كل كلمة قولتيها عني هي تقدير و تكريم عظيم ليا افتخر بيه شكرًا ليكي ولفريق اعداد برنامجك الجميل”.
