أوبرا مصر تَنشُر “بنصدق الحواديت” شعر شريف أنيس

الكدب بايع روحه ف العتمة
والضي شوك بيعذب الكداب
والصدق سوق خايب وفيه أزمة
والحق تايه ف الطريق متساب
والزيف بينصب سيرك كل صباح
يرقص على كتاف الخلايق زور
والناس تطير فاكرة الوجع أفراح
والفرحة خير بس الحنين مكسور
مزاد وداير مين معاه هيشيل
طعم الضمير كالمر ملهوش سوق
والليل دواير تطحن اللي يميل
والقلب لساه حر واخده الشوق
الكدب جنب الصدق قول يا ميزان
مين اللي يكسب فينا مين خسران
وش الميزان مكسور وقلبه كمان
والكدب واخده العند مش ندمان
نشتاق لطعم المر مهما يمر
ونبيع دموع الصبر للشاريين
نصبر وخيط الصبر تاني يِكُر
ونصدق الحواديت ومش داريين
يا معجونين بالكدب ليكم وش
بتلونوا ف الجرح بالتمثيل
لابسين عيون الرحمة لكن غش
سارقين شراع الحلم لما يميل
….