متولي بصل يكتب يوميات رمضانية
البيه الجزار
يا عم رمضان لو تسمح
البيه اللي عامل بيته مدبح
وكل يوم خِناق ونِقار
وناس بتصرخ وتصيَّح
وزحام تقولشي دي حفلة زار
طوابير ومش راضية تروَّح
عشان رخيص قوي في الأسعار
ولحمته طازة تفرَّح
ورغيف حواوشيه كبير جبَّار
تاكله تلاقيك ماشي تتطوَّح
قول له خلاص قرَّبت انهار
وبفكَّر انقل م المطرح
ما هو كل يوم يدبح له حمار
ويقول ده كان عجل بينطح
وكلاب كتير في شارعنا كِبار
أسمعها عنده بتنوَّح
ولمَّا وفِّيت حق الجار
ورحت أقول له حرام وانصح
يقول شوف الصين أو مينمار
فتَّح دِماغك يا با فتَّح
هو انا يعني دابح صرصار
صبح يا جار الهنا صبَّح
يا عم كل ربَّك ستَّار
وخد كمان كيلو واتفسَّح.
