متولي بصل يكتب يوميات رمضانية

يا عم رمضان طل وشوف
واحكم ما بينا بالمعروف
واللي تلاقيه هو الغلطان
تقول له من غير أي كسوف
ما هو كلنا في الأصل جيران
وكل واحد عنده ظروف
ولاعشان بطة رمضان
نمسك لبعض امواس وسيوف
البطة تشبه بطتنا
وعارفها من ريشها المنتوف
نطت كمان قدام بيتنا
تكاكي وانا واقف ملهوف
قلت أكيد جت لقضاها
أصل انا عندي عزومة وضيوف
خدناها دوغري طبخناها
طلعت ريحتها تفوح وتطوف
قالوا جيرانا سرقناها
هو احنا يعني سرقنا خروف
شوفوا اللي بسرقوا بالملايين
عايشين مفيش في قلوبهم خوف
ولا حد بيقول دول سارقين
واللعب يا با على المكشوف
واحنا اللي عايشين فيها مساكين
والجي أقل من المصروف
هو احنا لولا الغلا والدين
كنا هنظلم ولا نحوف*
………
الحوف: الظلم من كلمات العامية المصرية

ساحة الإبداع – أوبرا مصر