ساحة الإبداع
شريف أنيس يكتب خيال
خيال بيعاند اللوحة
بيكشف كدبة البرواز
عيون تضحك ومجروحة
وشوش فرحانه بس إزاز
خدتنا الذكرى والصورة
وجع بيدوس ملامحنا
قلوبنا التايهه مكسورة
بتحكي القصة والمحنة
يقولوا علينا بني أدمين
قلوبنا بتشبه الجناحات
نسافر ف الفضا طايرين
ورحلتنا آخرها سكات
قصص عنا وعن غيرنا
وناس تبعد وناس تهتم
وخلق تعيش على خيرنا
وناس فاتت ف روحنا الهم
نقابل بعض ف الطرقات
ونتبسم كما الأغراب
ونتنفس لكن أموات
وعاملين نفسنا أحباب
مفيش ف الصوره شيئ ثابت
وقلب الكدر مش بيحن
قلوبنا القاسيه لو تابت
تعود يسكنها مليون جن
بنتدارى ورا المرايات
وبنغطي العيوب بالنور
ونوصف روحنا ف الحكايات
وقلب الصوره يحلف زور
واخدنا الحلم رحلة زيف
بنضحك بس بره القلب
ونتلون منعرف كيف
ونرسم وشنا . بالحب
نكونش بقينا ناس تانيين
ولا إحنا بعاد من الأول
يفوت العمر بس حزين
ونرحل مهما بنطول
