ياسر محمود محمد يكتب انفصام

ياسر محمود محمد يكتب
انفصام

ماتقاومش
شعور الوحدة
اللي بيك
ساعة ما تنزل
من ع الرصيف
رصيف حياتك
والمدعو ذاتك

ماتقاومش
حكايا السهر
من حبيبتك
اللي رامياك ف التراب
كل ما تسمع دقة قلبك
الرهيف

ماتقاومش
وماتسرحش ف أوهامك
أنت أنا ؟!
صحيح؟!
جايز..
المراية مابتكدبش
لكن بشعر
إني أنا..واحد تاني
غير عينيك التعبانين
م القراية
وم البحلقة ف الخلايق

أناواحد تاني
غير قلبك المليان ذكريات
اللي كلهم غلابة
زيك.

هي ليه مش حاسة بيك
وحاسة بيا
هي ليه
بتشوف عينيك
غير عينيا
هي ليه مصممة
كده من غير لزوم
على كسر قلبك
وأنت مصمم
ع التضحية
بيا.

اسمعني..
أنا..أنت؟!
ممكن!
ونا برضه..
مش أنت !
لكن ف التفاصيل
بيسكن الشيطان
اللي بتكرهه
واللي هوه
بيهواني.

ياسر محمود محمد
عضو اتحاد كتاب مصر
الأربعين -السويس -مصر