متولي بصل يكتب يوميات رمضانية (رمضان كريم يا رب ما يخلصشي )

رمضان كريم يا رب ما يخلصشي
يفضل معانا حبل الوصال ممدود
ما هو كل شيء في الدنيا ما بيدومشي
حتى الجَمال لا يدوم ولا يدوم عود
عوِّدت نفسي مهما انام ما احلمشي
هيفيد بإيه الحلم يا مسعود
والشمس مهما ضوءها يحرق وشي
مش معنى كده إن النهار موجود
السكة قدامي وانا ما اعرفشي
شوك اللي فيها والا فيها ورود
مجبر من اللفة لكفني ونعشي
أمشي ولو كان الطريق مسدود
يا سكة اللي يروح ما يرجعشي
كام شاب من زينة الشباب مفقود
قلب الطريق بيضيق وانا بامشي
ما بقيتش عارف حتى الف واعود
حضن الحبايب ليه ما بيساعشي
حتى اللي في اللفة صابح مولود
الدنيا زي الغول ما ترحمشي
ما لناش بقى غير ربنا المعبود

ساحة الإبداع – أوبرا مصر