ساحة الإبداع
عبط شعر : الجميلي أحمد
عبط
شعر الجميلي أحمد
مالك
شايفك مهموم
واحوالك مش هي أحوالك
إيه سارق فكرك
مين شاغل بالك
متلخبط
ليه مش على بعضك
وتشابه فرحك باحزانك
مالك
سحبت روحك
وخيالها يمينك وشمالك
ليلك بقى صبح
وصبحك ليل
وعنيها مطرداك ف منامك
مالك
حبيت ولا ايه؟
عارفك حبيت
والحب مافهشي
فقير ولا بيه
عارفك حبيت
عنيك فضحاك
ومشاعرك مرسومة ف وشك
بوح باللي ف قلبك
أنا صدقك
مش ناوي أغشك
فضفض يا حزين
على فين موديني
ف طرقك
أنا قافلك ومحصن بابك
إزاي تهاودها على طرقك
كيف جرِّت جوَّاك الدم
وانت اللي شراينك مسدودة
ومليانه بهم
مالك
حبيت يا عبيط
طول عمرك كده
راح تبقى عبيط
كلمة تجيبك
كلمة توديك
لا بقيت بتفرق بين
البنت اللي بتضحكلك
وما بين البنت
اللي مسخسخة م الضحك عليك
اتنيل حب
