يا شيخ … شعر – النميري متولي
فوض أمورى للى خلق النجم و اداله البراح
و اشهد بمجد الكلمة
والشمس الحقيقة
و اشهد برب المعجزات
و الأنبيا والمؤمنين
و الشهدا
إنى مواطن
أليف
مبيعضش
و إن عضيت فعلى سنانى حسرة و تعاسة و ندم
ياشيخ
و أنت بتوزع النفحات إفرط قوى منديل سجايا الإله
و إعطينى أكتر حبتين
أنا وحيد فى الزحمة
و مؤمن فى وقت التوهة و العتمه
و الله يا شيخ
إن فسرت رؤيايا متتكاش على عللى
و لا تسودش وشى بزياده
و لا تحرقش شياطينى
أنا واخد عليهم قوى
و هما ساعات بيونسو الوحده
أمانه يا ربنا يا سابل الستر ع العاصى
و ساترنى
ما ترمى ضل البلايا على جتتى المالحه
و لا تسبى عينى محبة
و لا شوق و لا ارتياب
خلى الغياب
ليهم
و خليلى غنا اللقيا . .
وووه يا شيخ
سبحتك جراية ب الأوراد
و التسبيح و أنا متيم ببابك
خبطت و الرد مش جايينى
طب يعمل ايه اللى شااف النور و اتعمى
أو اللى شاف الضلمه ياما
و اتمنع م القول ..؟
شايل جتتى المالحه
و بتعكز على الأشعار
و أدور فى دولايبى القديمة عن ورده بيضا
و عن جنيه ورق
مكتوب عليه ( بحبك ) بخط مش واضح
و عن قصيدة
كتبتها …. و أنا زهقان
أمان يا شيخى .. ادخل و ما تخفشى
لسه بلل ف النعش ما نشفشى
ادخل و سمى و كمل الحضرة
سيب سبحتك جنبى
يمكن افتكر حاجه من ريحتك
ساعة ما تيجى الأسئلة .. تنهال
= ليه قلبت دراما كده
و النص واخد فى السواد
نرجع خطوتين
من ساعة وردة بيضا .. و نكمل ..
و عن قصيده فى دولابى القديم
ريحة عطن ورق
وريحة ( سكريه ) لسه فى الكتان
انده ياشيخ و لا معدتش تسمع النجوى
ادخل يا شيخ
و اقعد
و قوله ف سيرة أبو زيد
و الشاطر حسن
قول ..
الليل بيدخل روحى .. يتسحب
فيهز شيخى الحيط ويدوووووووووووب
و الاقى
السبحة بتضوى
و ألقى روحى مرميه على حيطه
و لسعة برد واخدانى
أنا دخلت فى موت
و لا
كابوس تانى .. .. !؟
