خــش جنيــــنتي … ماهــر مهـــران
خش جنينتي
شعر ماهرمهران
(1)
هلبت ما الدنيا تعدل
ونقطع في المكيف تذاكر..
بعد ما عشنا نقلب، ونعدل
ونتعلّم منها، ونذاكر!!
(2)
إيه رأيكم
بعد ما شفتوا الخصم بيبتسم؟
طيب حسيتوا بخيبة الناس
لمَّا تتقسم؟
طيب جربتوا
مرارة الملك اللي خسر العرش؟
طيب إيه رأيكم في حرقة الدم
لمّا الهالوك التعبان
علي النخل الحر يترسم؟!
(3)
خش جنينتي، وخد أفكار
وغافل وانْهش والْطُشْ..
وخليّك كده حرامي أشعار
تسلق، وماتعرف تطش!!
(4)
الأسد في الغابة
غير الأسد في السيرك..
يعني الحاجة مش حاجة
واللي حواليها
هو سبب الإيمان والشِّرك!!
(5)
أنا عقرب ثواني نازل لف
غنوة ف كاسيت عمره ماسف
فلاح نجاح راضي بنفسه
ونيل بيفيض مش بير وجف..
(6)
بعد التعب والعرق وشيل الحمول
بعد العطش والفلس وحزن الطبول
بعد ملوحة القلب ونواح الحمام
خلص الشتا، وفرحنا بالمحصول..
(7)
مسا الجمال ع ال مش ظاهر
طرح البساطة ، بلا مظاهر
اللي باصص على بكرة
وتملي بكرة يبقا مسافر
مشروع نبي ودواه في الصبر
أحلف ع النهر إنه بلسم
وغيره تركيب وظواهر!
(8)
فكّر يا صاحبي،
واحســـــبْ حساب خطوتك..
وامسك لجام الطــــــيش،
دا الاندفاع بلوتك..
دا فيه خطــــــــوة
تخطيّها يا معلّم باستهتار
تعيّشـــــــــــــــــك في هم ، ونكد ، ومرار
وتفضل للأبد حسرة وندم
وتفضل سبب وكستك!!
(9)
كل ما أشوف حبيبتي العسل
أعشقها بمشاعر غشيمة..
بعدين أقول لنفسي:
يا حمار يا ابو مخ بهيمة..
يعني أنت ف حبها تشرب المر
وساعة الجد
يشقطها منك أبوهشيمة؟!!!
(10)
البذرة اللي بقيت شجرة
وضلِّي اللي تعب من الجري ورايا..
وعقلي اللي بقي علامة تعجب
وسكتي الحديد اللي بقيت حوداية..
وروحي اللي بتبل ريق الأرض
وبتطبطب بعشق على كتف سمايا..
وصورتي المهزوزة في وش الميه
وملامحي اللي مش جايباها مراية..
كل دا بيصحّيني من نص الحلم
وبيقول لي : لـ حد هنا واستنَّا
لـ حد هنا وكفاية!!!
