مش ضروري نعترف بالانهزام شعر : بسمة شعبان
مش ضروري نعترف بالانهزام شعر : بسمة شعبان
شّكِل مشاعرك من ورق
وأما الألم يستنزفك
ابقى انزفك
كرمشها مرة و لمها
إعمل سفينة
لف المواني ع السطور
إخلق طابورك من عدم
وإحفظ مكانك أوله
مابقاش في روح للفرهدة
للإمتثال والإنتظار والفضفضة
ماهو مين هيختار يصطفيك
وانت اللي تايه مطرحك
كل القلوب كات ماسك فيك
طيبت ياما حزنهم ..
معذورين
واما الحنين يكتر عليك إبقى افرطه
وزع رغيف الحب لقلوب الطيور
على كل سور .. على كل قلب ما حبناش
السهل بنبيعه ببلاش
بس قيمته ف مطرحه
في عيون طفاها القهر و الخوف و الأسى
عمرك في يوم ما هاتتنسى
الغدر عمره ماكان ملازم طبعهم
الحوجة مرة
بس الأمر
تقبل تعيش على كل بر
تفضل محطة لانتظار
كل إللى فايته الحلم
كل إللى محتاج طبطبة
ماحناش ياقلبي مرغمين ع العيش كدا
و لا يشبهك طعم القساوة في ملحهم
دانا نن روحي بينتفض ..
لو بس مرة لمحت عين ..
متلجمه بطعم السكوت
أنا كلي صوت
مخلوقة نور يِضْوِي العدم
قدرك كدا
مين يعترض ع العيش ونس
والموت يادوبك ع الورق ؟!
اللي زيي ما بيموتوش
محفور وطنهم ع الوشوش
بيكفنوهم بالسما
و بيدفنوهم في القلوب
اللي زيي مالوهش توب
و لا عمره كان عايش في قالب
عرفت ربي بالمحبة
و عرفت ديني بالأمل
ثروتي حبة جُمل
م المستحيل إني انهزم
أو أموت في جلدي م الذنوب
ما بيتجمعوش
و لا عمر روحي ميزت شكل الرتوش
و لا سكتي كات بين وبين
طول عمره لون الحب لوني
و الحروف تشبه جنوني
توهت ضعت و لملموني
هما أصحاب الطريق
عشرة الحلم البرىء
شاهدين على طعم السذاجة
حاسوا الأماني وهي سادة
ميزوها وهي خام
ميزوني في الزحام
عوضوا قلبي المحبة
كل يوم يسقوني حبة
علموني أعشق بروحي
واحضن الخلق بعنيا
هما أمي وهما ابويا
وهما معنى الإنسانية
هما معنى الإنسانية
