ساحة الإبداع
جزء من قصيدة عودة فلاح للشاعر علاء رزق
ساعات بتمر ومسافر لشط بعيد
وذكري الماضي رجعالي وقلبي شريد
سكوت الليل يهدهدني لصبح جديد
وواخد.بتي في حضني بقلب سعيد
بقالي سنين وانا فاكر طريقها منين
وفرحة قلبي سبقاني بطول فدادين
الاقي الصحبه وقفالي هناك صفين
ويحضني نسيم الريف كما العاشقين
الاقي الشمس.حاضنه المي في مجريا
بلؤنها الفضي تعكسها علي مرايا
وع الحدين جرون بتنادي مدرايا
واشوف فلاح علي.النورج وقدامه بقريا
اشوف البنا شد الخيط وفي يده لبنايا
وراضي بزاده لقمه عيش وجبنايا
وعود جريروحبةميه من ترعه وقنايا
شكر ربه.وباس يده لاجرة يومه في بنايا
اشوف العرس متزين علي لجمال
بتتمايل وتتمخطر في ايد جمال
وفوق منها تشوف صوره لاحلي جمال
ابيع محصولي يتبارك ويجيب مال
صلاة الفجر لمتها كيوم جمعه
صفوف مرصوصه لامامها سكوت سامعه
قلوب ساجده نفوس راكعه ودان طايعه
من التقوي تشوف فيهم عيون دامعه
وادي الفجر بيشقشق سامع له ادان
اشوف الهدمه بتستر جميع الابدان
وفوق الترعه عل توته تشوف قردان
نسيم الورد بيهفهف ف كل اوان
اشيل الفاس واطبطب بيه علي ارضي
علي كتفي يزين طولي كمان عرضي
وف دراعه اشيل الزاد وانا مرضي
وساعة الجد هو سلاح يصون عرضي
قصاد شباكي في الشجره كتييير عصافير
وبتشرق شمسنا بفرحه.قوام بتطير
وادي.البنوته بتغني هنااااك ع البير
وصوت كبايه مضروبه في قلب الزير
رجعت لماضي كان شربي من الرشاش
لقمة عيش اقرمشها من القرماش
دا حتي التوب مترقع بقص قماش
وساعة نومي افردها علي الابراش
الناس بقت وشين زي الصقور جارحه
والارض بارت بقت للزرع مش فالحه
تبص جوه الملا ماتلقي إيد كادحه
حتي خيال المقاته ماعدش فيه صالحه
مباني عاليه بقت للسما حاجب
وحريم بيتكلموا بالرمش والحاجب
فين الكرم يابلد كان في دربكم واجب
قوليلي ايه في البلد دلوك يكون عاجب
وفوق البيت ع الجله تلاقيها إطباق
ريموت داير والشيشه قال طمباق
وعلي التشفيره راح داخل معاها سباق
وعيش م الفرن متهوي علي الإطباق
وزاد لهيب الشمس والناس هنا نايمه
مالاقيه حتي الزاد عن العمل صايمه
ع القهوه في الحاره ليلاتي ماهي قايمه
وعيشة الفلاح ع الحاله دي دايمه
يامحلي اللمه لما البال يكون خالي
تلاقي الفرحه بين عمي وبين خالي
ووقت الشده هم الناس يكون حالي
نفسي اطير لكن القيد في خلخالي
بيوت جميع البلد لقيتها مقفوله
حتي الجوامع كماني ياربي معقوله
تشوف فلاح عينيه بقت حوله
سالت شيخ البلد قال عدوه منقوله
وراح التبر بأيامه بسره باح
حتي التبن بغلاله مستني صباح
تشوف.الكلب متعشي ماعاد له نباح
وطوب الارض يهمسلي بموت فلاح
وبنتي وسط الاسي تسال علي ناسي
لطول الغربه يابوي بقيت ناسي
خُد المنديل واربطهولي فوق راسي
هات قدوم وف حضنه يبات فاسي
شد الحبل مرجحني ف غصن التوت
ولسه العش فوق منه عياط كتكوت
وادي طرمبه وفلاحه عليها تفوت
تروينا وفي فروعها نلاقي القوت
حلمت اشوف جدع فلاح ومتهني
يحرت ويسقي ويتني الكم مستني
بيزرع خير ومن عرقه ايديه تجني
وياه الربابا و ناي فرحان بيغني
