أوبرا مصر تنشر توووت للشاعر الكبير برهان غنيم

على قد ما كان الليل
ف العمر الفايت
من أول ماوعيت ع الحلم ــ
أبيض ومهاود
ومريح
ف كلامه وف سكاته
وب تسمع فيه القلب ودقاته
وتحط ف كفك ــ فراشاته
وتغمض فيه إحساسك
عن كل ماليك
ف يشدك من كل اللي ماليك
ويفتَّح شناشين روحك
ويوارب ميادين بوحك
على قد ما كان الليل دا
طول العمر الفايت
ب يلمك من بين كراكيب الدنيا
ويجمَّع لك كل المتنتور منك
ويجيبه ف حجرك
ويسيبك تختار
الليل
كان خزنة أسرار
وجدار ساندك من كل السخافات
اللي ب يحدفها عليك أي نهار
كان زنزانة براح
ومفيش سجان
والمفتاح يفتح ب النيه
بالرغم ان الليل كان زنزانه
لاكن
أول ما تخشه وتقفل على نفسك
ب يسيبك وياها
كان فاضل بس يوصيها عليك
لاكن
بالرغم ان الليل دا
كان ب يبعتر لك كل جروحك
ويشوطها بعيد عنك
ويجري وراها بعييييد
كان واضح إنه مخبيلك
ف العمر كروت
راح يكشفها
ف وقت ما ييجي الحلم يموت
وتقرَّب من باب الصحيان
ساعة م القطر اللي ف عمرك
يزعق ” تووووت “