اوبرا مصر تنشر أخرك بلوك للشاعر عادل عبدالموجود
أخرك بلوك
…
(بلوك القلب بيتعِمل)
لما الحكاية تكون خلاص
لافيه حلول منها الأمل
ولافيه من الأحزان مناص
فبلاش تحاولي تشدي أيامي العجاف
وتزودي على الرمل أحمال العفاف
وتوصفيني بكل أخطاء الزمن
مابقتش من الأيام باخاف
أصلا حكاية حبنا كانت سراب
كتر العتاب
بيموت الإحساس بعشقك لما كان
زمان أمان
أو كنت فاكرُه كان كده
ماهو كل ده
من مر يومي في السهاد
من كتر كبرك والعناد
من بُعد فكرك عن طقوس العشق
وأصول الرشاد
كان هوايا تحسبيني أصل تكوين الوجود
مشغول على صدر المناعة
ضد فيروس القيود
كنت عندي من معايير الرضا
وانا كنت ايه؟!
مش ركعتين السهو في الفرض القضا؟!!!
أهو لما تنسي انك إله
ساعتها بس تقيدي شمعة تشدني
وانسى تماما فكرة الشق الغبي
لما اتحفر في السكة بايدين الغبا
أنا شيئ مجرد تملكيه؟!
مملوك بكلمة وفيها ضحك على الدقون
وانا اصلي مخلوق كالبشر
ومانيش حجر
بتهزني ريح المواسم لما بيزيغ البصر
فبلاش تعيدي في المشاعر دنيتك
وتعذبي الأحلام معاك في سكتك
يادولتك:
قفصك خلاص
مابقاش يحوط على اللي جاي.
