سعيد سلامة يكتب حنين
أنا استخسرت في نفسي حناني
وادّيتهولك، هل فاكراني؟
ولَّا اترمىٰ كل اللي ما بينا
ومن الصعب أقابلك تاني؟
مين.. يستاهل غيرك ألاطفهُ؟
أو مين هيغرّقني في عَطفهُ
ده انتي الورد اللي أنا مش قادر
من جُوايّا أقرّر قَطفهُ.
وانتي معاه فكّرتي في حالي
ولَّا في نظرك رُوحت فطيس؟
هل تستوي غالية مع الغالي
بالغالية اللي في حضن رخيص؟
نادم على أخطائي وعايزك
بَحر..وكُلّهُ حنين لــ أزايزك
قابل أخسر عُمري بحالهُ
بس قُصادهم أصبح فَايزك.
بقىٰ أنا اتعد مع الضايعين؟
بقىٰ أنا أتحايل ع السكاكين
تِبقىٰ في بُعدك عنّي أحن
م اللي يارب تعود لي؛ آمين.
حجم هواني في نظر الناس
قد ما بينّا السد الفاصل
صورتك لسه في قعر الكاس
فَـ انسىٰ ازاي يا حبيبتي الحاصل؟
ايه المطلوب؟اللقُا طَوّالي..
أنعس ع الحس الأوبرالي
مانتيش عارفة اللي بيحصل لي
أو في غيابك ايه بيجرىٰ لي
كُل..مكان روحناه بيسألني ..
كل دقيقة شُوقي بيغتالني
أنا جنّني البُعد، لُقاكي
مِين غيره بـ إيده يعقّلني؟
تالت شَهر، شواني القهر
ومحني الضهر وواضحة الحَانية
باني وانا أحوش تماسيح النهر
وأغطس لك للناحية التانية.
