من نن عين الشمس شعر: عبدالرازق الشريف
فتّح عيون الشمس
والنور مسرّع خطوته
وكانس ظلام الأمس
والديك رفع صوت الأذان
على حيط جارتنا الطين
قامت بنات الحى باستحياء
نفضوا الكُحل م العين
صحوا الرجال فجر الشقا اذن
والارض قالت للولاد يلا
قاموا الولاد جاريّن
قاموا الولاد جاريّن
على دق باب الله
لمت كفوفكم كل دمعات الندى
والشمس حميت وقتها العرق ابتدى
فات على الجبين غطاه
وجرى الغيطان ع الحصي
دوب قدام الشقى من كتر سعى شقاه
مكتوب على جبين الشقايا
الشمس زى الضل
السُهد قطّع جتتك
امتى القمر ها يهل
اسمر وسمرة جبهتك دى جمال
ابدا ما كتفك مال
بس السنين بتذل
زغلل عيون الولد
الحلم على غفله
وكأنها صرخه
قلبت كيان حفله
فتحت فى راسه طريق
والعله فى القفله
حس فساعتها إنه
جاهل طريق الضى
مش كل عايش حى
ولا كل ميت مات
من حد عاش دنيته
وعمره اتفرد مسافات
وحد عمره اتبرى
فوق الشقا صدقات
شاف السنين بتفوت
فى عيونه وداراها
نادوا لصلاة الحزن
قام وحده صلاها
علشان كتاف الولد
عيب لو فى يوم بتميل
نادى بعلوا الصوت
يا مقسمين الصبر زيدوا ضلوعى كيل
ويا مقسمين الشقا
ملت كتافى الشيل
ضاع الامل بالالم مش كل صبر جميل
فجأه المكان ضلم
والشمس نورها اتكسف
لما الولد دمع
ساعة فوات الاسف
لما اتكوى بالشقا
وجاب العلاج بالسلف
شابت ايدينه خلاص
وعضم الكتاف اتلف
الناس هنا جاهلين
حاسبينها بالمقلوب
ماشين طريق الذنب
رافضين طريق التوب
دابت قلوبهم عرق
ولايخلعوش التوب
الايد فى حضن الفاس
مش زى حضن القلم
رفع الايدين للعزق
مش زى رفع العلم
كل البشر واحد
كل الخلاف فى الالم
ضحكوا علينا زمان
وغمضوا عنينا
وسقونا عشق الشقا
وداروا لينا الراس
ربونا إن البدل
مش لبس كل الناس
فرمينا حضن القلم
وعشقنا يد الفاس
والفاس اذا بتعشق
بتحنى كف اليد
تسرق سنينك هدر
ولا يوم هتوصل حد
حبل الشقا جرار
ياللى انت غاوى الشد
سامحونا يا أهل الله
لو شيلنا ع الأكتاف
بيعلمونا نخاف
منخافش يوم الطلق
ولا يوم نخاف التار
لكن نخاف العار
ونخاف نسيب الارض
ونعيش بناخد قرض
فى ترابها لجل نعيش
ونفرح فى اخر اليوم
بشويه الملاطيش
وتبني كتافنا بلاد … لكن منسكنهاش
يسكنها شيخ البلد وبيحرسوها الغفر
واللى كواه العفر
ضيع سنينه بلاش
وما دام فى ايدنا الفاس
هتعدى بينا الناس
لشطوط مهيش لينا
وتعدى فعنينا أيامنا منشوفهاش
وتبني كتافنا بلاد
لكن منسكنهاش
