سيرة السمر شعر : الجميلي أحمد
سيرة السمر
شعر : الجميلي أحمد
أسمر جنوبي …
وقلبي أبيض م الحليب
وبسيط …
ككل الخلق ف بلدنا
ريحة تراب الأرض
ف هدومي
لون الغلابة
الشقيانين …
لوني
طيبة ولاد البلد
ضحكة ولاد البلد
تلاقيها ف عيوني
أسمر جنوبي …
ومن آخر بلاد الله
قلبي معذب بالهوى
ساحة لعشقك
لم تجيبي مداه
طاوي السما فرحتك
ومأمِّـنه ليكي
ما يغركيش عجَزي
ح تفتـَّحيه بيكي
ح ترجعيني
صبي
طيب كما الأوليا
وإن شـَب عودي …
وكبـِرْ
ح اتخبَّى ف عنيكي
أسمر جنوبي وشقي …
بحبوح ومتعافي
شايل هموم الوطن
على راسي وكتافي
حطي على جنتي
حزنك وأحمالك
صُبي على جنتي
طعم العذاب شافي
سايق عليكي النبي …
والأوليا البررة
ما تطلعيش سري
أو تحكي بيه برَّه
خلـُّهْلِي عندك أمان …
وإرقيني من نفسي
وإن شفتي يوم ضحكتي
إرقيني 100 مرة
أسمر .. جنوبي .. وجدع
ف العوزه تلقيني
قلبي حنين قوي
وبتفضحه عيوني
ما يغركيش كلمة صعيد
دا إحنا شـُقاي .. خالص
رجالة وقت اللزوم
وحنينين .. خالص
بنواجه البرد العفي
ما بننقرص .. خالص
وإحنا ولاد الشمس
لمَّا تشتعل .. خالص
وإحنا نبات العرق
والمحرومين خالص
خالص أنا ليكي
وانت الدوا الخالص
يا نسمة الحرَّان
لحظة عصاري الصيف
يا صيف ربيع …
وربيع يضُم خريف
قلبي إتملى بحبك
وأنا قلبي أصله رهيِّف
قلب الولي …
قلبي
قلبي المريض ما شـْفِيش
سِـيبك من اللي عشقك
واللي انكوَى بنارك
أنا نارك انتي …
جنتي
منـِّي خُدي تارك
تارك زمام البلد …
لجلك وجاي ليكي
أنا من زمان بأحلمك
والحلم على قدِّي
بدِّي أكون عشـِّك
وتعـَشِشي قلبي
يا نسمة الحرَّان
دا انتِ الونس والناس
وانتي الحياة كلها
منك أنا وبيكي
فاطم عليكي القلب
ومحرَّمُه غيرك
يا اللي ف هواكي نجاة
من كل شيء واعر
ضحكة عيونك ونس
ما يحسُّه غير شاعر …
شاعر أنا وأسمر
و ف قلبي 100 فدان
ح تطوعيه .. طايع
ح تلملميه يتلم
قلب الولي
قلبي
وانتي اللي فيه الدم
يا غنوة المساكين
ومعالم الجنة
رحلة طلوع الصُبح
من وشـِّك
دواوين قصايد شعر
تتغنى
صُبـّي عذابك عليْ
بيكي أنا مآمن
ومصلـِّي ليكي سنين …
الفرض والسُنـَّة
منور الدنيا يا شاعر