.من طينة تانية شعر : ناجي شعيب

من طينة تانية  
                 شعر : ناجى شعيب 

قلبى بناه ربنا بالنى والقصر مل 

علشان يرطب قلب سكانه

لا عمره نشّع من رطوبة الزمن

ولا ف اى يوم اتشققت حيطانه

من لسعة الجير إللى لساه حى

ف وسط قلبى عملت بير سلم 

وبنيت ف أخر الطرقه فرن خبيز

علشان اشون فوقه كراكيبى 

ركبت بالغصب  فوق بعضهم 

تسع سلالم مليانين نهجان

ما انا بقاوح روحى من صغرى 

طالع من الحوش الطرى

لسطح من غير ضل 

نازل من السطح وانا عرقى مرقى

ساعة ما شوفت الشمس بتلم الغسيل 

وتطبقه وترصه ف دولابى

بنيت ف جنب القلب تعريشة بغُدادلى 

وزرعت ع البغُددلى لبلابه 

طرحت ومال لبلابها على بعضه

لجل الحنين ما يبات وتكمل القاعدة 

حطيت زيرين فخار يسقعوا الميٌه

وعشان يخش الهوى البحرى 

عملت لقلبى تراسينه ع الشارع

مديت حبال الموده من عمود للتانى 

ع الرف فى التراسينة تلقى متخزن

زلعة عسل ومعاها زلعة مش 

وشوال دقيق وبرطمان سمن بلدى 

وع الحيطه متعلق شواشى البصل والتوم 

وحبيبتى اللى م الفجرية قايمه 

تصّحى طشطية الميّة 

على زغرودة حبال الغسيل

وهيّه ملفوفه على بعضها 

حبلانه ع الصبحية بالمشابك والهدوم

عمر اللى سكنت فيّه 

مادورت ع المشابك.

لا ف يوم النور قطع

ولاعمرها الميّه قطعت وهيّه بتستحمى 

ولا مره حبل الغسيل اتملى ونقط

اصل إللى كات ساكناه حبت عتبته

وماعتبتش سكنها الا لقبرها 

وحتى لما عتبت براه 

كان بالبدن بس مش بالروخ

مهى اصل روحها عششت ف الحيطان 

عمرى ما بخرته ولا ناوى اغير هواه

كل إللى عايز يسكنه من النسا بعديها

يسمى قبل ما يدخل 

ويخلع بره منه مداسه

القاهرة4 / 7 / 2021