ساحة الإبداع
عطش السنين .. شعر بسمة شعبان
و واقفة سنينك الفايتة
بتتوضا على رمشي
و تحلف لي
ما زي سواد عيوني الصافية
شافت ليل
و لا عمر الوصال بينا
يكون له بديل
بإن الشمس في ملامحي
بتوهب لك سنين جاية
برغم انك كتير فيا
بتقسمنى وتقتلنى وتحلمني
أكون تاني كما نفِسك
و أنا نفَسك
و لا عمري هاكون غيرك
أنا لغزك و تفسيرك
و قادر أي شىء فيا
يغير مجرى سير سيلك
و قادرة الشمس في ملامحي
تشقق أرض غرقانة
و تبدر أرض عطشانة
و تحلف لك
ما عمري سنيني حلمت غير
ربيع النور في أحضانك
دا أنا ذُلك و سلطانك
و أنا ذنبك و غفرانك
و أنا إللي مرايتك الصادقة
في عز العتمة تلقاني
سراج قايد في وجدانك
هاتيجي سنينك الجايه
و تتوضا على رمشي
و تحلف لي
ما زي سواد عيوني الصافية شافت ليل
و لا عمر الدفا فيا يكون له بديل
بإن الشمس بردانة
و إن الأرض حرنانة
و إن الضحكة من بعدي
صداها عويل
