ساحة الإبداع
موضوع التعبير .. شعر : عبيرالراوي
كان دايما ساعته المشغولة بترتيل الفجر
بتسامر مغرب يومه المطحون
كان كل سكون بيعدي علينا
بياخد مني ومنه كتير
موضوع التعبير
اللي كتبته في يوم عن كتفه المخلوع من مَكن المصنع
لما اصحابه جابوه ع البيت
نظرة عينه منعت عيني ساعتها تدمع
كان لازم يرجع علشان يقراه
مسامير المكنة وتركيبها شغلاك للآن ؟!
إزاي سايبينك فوق تِشغل وقتك
وتسيبني استناك زي زمان
طب عايزة كمان
فتجيب لي العود علشان يعني ما اشعرش بحزن
بنتك ياحبيبي ….
مش ست الحسن ….
زي إنت ماكنت بتتخيلها مابين السُمر زمان
في غيَابك …..
أنا و المُر اصحاب
وعشان روحك ماتحِسِش حُزن
يوميا أنا و العود
بنزغزغ في الأيام علشان تضحك
إيه رأيك ؟!
أبعت لك موضوع التعبير تقراه
جايز يفتح نِفسَك …..فَتعود
