ساحة الإبداع
قصيدتان … أشرف عتريس
(1)
يامدينة من غير قمر ,,
عارف انى هاموت فيكى ناقص حلم ,,
تبقى دى عيشة والنبى !!
طب كيف الصقر لم يطير لغاية دلوقت
ومين اللى هيلم الهوا بجناحه عشان ينام بعرض السما ,,
ماينزلش غير للصيد وريح البشارة تفوح وتهل ,,
عارفه لما هاعجز هيحصل ايه ..؟
هنتف ريشى واكسـر ضوافرى واعصر قلبى
مش عشانك ..
ده عشان الضل اللى خبّانى
هارجع أطير وحدانى .
(2)
كل الكلام طالع بصوت الكمنجات ,,
هربان من حمزة وحليم والناى الحزين ,,
رايح يستخبى فى حته تانية خالص ,,
مزيكا بطلها الباخون والهاند بان والجيتار الليد ,,
وتراك جديد للأندر جرواند يستلمنى ،،
ياجسم من لحن وعرق وحبة دموع ،،
هاتعزف غنوتك من غير ماتلف الدنيا وحدك ،،
ولاّ هتفضل تحت شجرالموت والحياه الواسعه هناك ..
تغنى وتبتسم لفرج الناس ..
وعتق الحزن من رقابيهم ..
بالعشم !!
