ميت حي شعر مؤمن شاهين
ميت حي
زي رمل الصحرا
ف قيلتك و شاوياني
أقول عطشان
تداري ميتك مني
يا كاوياني بنار الغربة
وأنا ف حضنك
بشيل همي
علي راسي
وأدور سواح
أسيب قفه
أشيل مقطاف
وطول عمري سنيني عجاف
ودمي اتصفى
من جرح الرغيف الحاف
أقول يا أمه ضميني
و حاوطي علي
دا أنا إبنك وتكوينك
أنا زرعك ونور عينك
ألاقي ضحكتك راحت
وصوت غضبك يولي علي
وبين زعقك وكرباجك
أتلوي كأني حي *
وبين شطك وأمواجك
أديني مرمي ميت حي
وصيادك عاملني طعم
رابطني بخيط ف سنانيروا
معلقنني من رجلي
يصيد صيده
يجهزني لصيده الجاي
أغيظه بصبري وسكاتي
يزيد بطشه م قولش أي
تشاوري عليه و تتباهي
تقولي يا سبع مالك زي
يفوت كبره عاملي ذوات
يقول أمي دي للبهوات
تغنيله و تتمايلي
وﻻ مرة تقولي أخوات
سرق فرحي
وباع طرحي
بدل واصي
صبح جلاد
وكان يجمعنا بيت واحد
بقينا بعاد
وبين ظلمك وبين غدره
هجرني الفرح
و طهري اللي في النني
عماه الجرح
و مستني فراق الروح
ودفن مماتي ف سكاتك
ما أنا كبشك و محراتك
يا مسحورة و مجبورة
و خيط نورك طفاه الريح
و ﻻجل إبنك يشوف ضيك
لازم تصريح
فخد نايبك من التجريح
و عيش ميت
ما دمت صريح
