الجميلي أحمد قصيدة جديدة ولد مجنون
بحبك قد كل الكون
وقد جنوني
وجنونك
وقد العشق
والعشاق
بحبك
والبراح كله مابيسعنيش
وأنا مشتاق
بأموت فيك
وأنا معاكي
واموت لو غبتي
يوم عني
من الأشواق
بحبك
قد حراس
السما والأرض
وقد الشعر والشعرا
وأحبك حب
مالي القلب
بحبك
بالجنان والعقل
وبالعامي وبالفصحي
وبالفرعوني والمصري
وبالبحراوي وبأصلي
وأنا أصلي صعيدي اصيل
وشوقي ف قلبي بيلسوع
كأنه ثوره
أو بركان
وأنا من صغري غاوي جنان
ولد عشيق
وعاشق كل شئ فيك
بحبك
زي ما تقولي كده
بحار وغاوي البحر
ولد مجنون بتفاصيلك
بيعشق فيك مرة الخير
ويعشق فيك مرة الشر
وعامل وشك مراية
وف عنيك بأقول الشعر
وقايس الكون
علي قدي
وعلي قدك
ومن خدك يشع الورد
واه
م الود
لما يمسنا شوكه
مابيفرقش
بين عاشق وبين
معشوق
وانا عاشق علي الآخر
وهافه الشوق
بأشوف
الدنيا ف عيونك
سبح دراويش
شجر طارح
غصون زيتون
بأشوفك
فوق وشوش الخلق
قمر بينور الدنيا وله حراس
قصائد شعر مسكونه بجنيه
وماسه الناس
وسارقة القلب والتفكير
وانا اصلي صعيدي أصيل
وعمري في يوم ما كنت أجير
ولا حبقي
بحبك حب فاق الحد
وزاهد دنيتي فيك
بحبك باختصار
ع القد
وانا أصلا ولد مجنون
بغيب عن وعيي
لو غبتي
واغيب
م الكون
ومين حيلوم علي
عاشق بقلب حنون
